Luke 20

Lususue Mumu Lololos Ne Iesu Ga Gugu Min

(Mt 21:23-27; Mk 11:27-33)

1At lara laaleng ne Iesu ga nemen to xeneng at loogu laplavang, ga anasa limixin la ga vavang bok tidi mi Lagale Lavavang; la lavamaasa silok eburu mi luvuttadi loklox ase at Lenavolo, la loxongkulao silok diga vot posiga i, 2la diga sue i, “Una tong i rinama, nege ga lok li u xusu una lok na lempanga? La nege ga raba u mi nom lololos kusu una lox i?”

3La ne Iesu ga vorang i ridi xeretna, “Nia bok ana sue nimi mi lususue. Mina tong i ria, 4loklok ti sep susu limixin, ne Jon ga ruuna i ga laa meva? Boro at ne Moroa kopla boro at limixin at na lavatbung menemen?”

5La diga esue min kantubu atdi, la diga lok, “Ataba tong lavanga salai? Mo do ata lok keretna, ‘Boro at ne Moroa,’ neni naba lok, ‘Tila ba mi goxo nuunu at ne Jon?’ 6Do ata lok keretna, ‘Boro at limixin,’ ana axap limixin diba lu amet dik mi laxanuat, mila di nuunu do ne Jon neni leeme vapaase alii.”

7Kuren la diga lok ti ne Iesu, “Maxoklen i do ga laa meva.”

8La ne Iesu ga lok tidi, “Nenia bok a noxo tong i rinimi do nia a lok na lempanga mi lololos meva.”

Lavapaase Poovo Ti Luvuttadi Xapmek Diga Lok Tatao Laraamang

(Mt 21:33-46; Mk 12:1-12)

9La ne Iesu ga vaase manga mi lara lavapaase poovo ri limixin, ni ga lok, “Lara laradi gatlo laraamang vaen, la ni ga raba luvuttadi min kusu dinak lok tatao laraamang. La ni ga vas kaxat uto at lara lenep silok at lentaba levenmaares. 10Se at laaleng ga vot kusu dina dik kaka lempeven una, neni ga riki lara lasaxaruki uto at luvuttadi loklok tatao at laraamang kusu na lok ka toxot at lempeven una xusu rin. Ketla luvuttadi loklok tatao at laraamang digap sep nom lasaxaruki la diga riki amlong kixinax i. 11Kuren la ni ga riki manga lara lasaxaruki; ketla luvuttadi loklok tatao at laraamang digap sep box i, la diga lox amangan tinotno i, la diga riki amlong kixinax i. 12Melemu neni ga riki lasaxaruki sepsev avantun, la luvuttadi loklok tatao at laraamang diga sep kapmex i, la diga lu asu min ukamang.

13La mo laradi at nom laraamang vaen ga lok, ‘Anaba lok lavanga salai? Aba riki lamdak akmokso rak, la kerepmo nedi diba lok ngangao ren!’

14Ketla nom luvuttadi diga ven i, diga lok tidi xa, ‘Lamdak akmokso at laradi at na laraamang. Ata sev amer i, la ataba ruuna ka na laraamang!’ 15Kuren la diga lu asu min ukamang at laraamang vaen la diga sev amer i.”

La ne Iesu ga sue di, “Lavanga salai laradi at nom laraamang naba lox i ridi nom luvuttadi loklok tatao? 16Neni nabat pas la na sev amet nom luvuttadi, la na raba nom laraamang vaen ti tentaba tuvuttadi vetpes.”

Se mo limixin diga ronga i na, diga lok, “Kopmen tinotno!”

17La ne Iesu ga ven tidi la ga sue di xeretna, “Lai lavasuun at na levelinga boro at ne Moroa?

‘Nom luat luvuttadi xipkip gu diga sok tixirixes kepe i, ga ravasu ngan luat kis la lugugu ren i silok aleng.’ ^a

18Dola tara na subu at nom luat, neni naba rekoxorop axakalik; la do, mo luat na subu ro mavana at tara, neni naba remumus ngan laxakup.”

Lexekepe Pilas Ti Ne Kaisar

(Mt 22:15-22; Mk 12:13-17)

19Luvuttadi loklox ase at Lenavolo eburu mi lavamaasa silok diga lok tong i xusu dina ranga alis ne Iesu ap mo loxonaleng, mila digaklen i do ne Iesu ga tong na lavapaase poovo mumu mun di; ketla di goxo ranga alis i mila diga marat at limixin.

20Diga ngangais ti toxonaleng petpes kusu ri ranga alis i. Diga un ka lentaba luvuttadi xusu diba lok ngan luvuttadi vapaase ruturun, la diga riki nedi xusu dina bala arup ne Iesu mi lususue, kusu diba ranga ka i la dina lok li i at lavapaase ro melamgo at laradi gomgo. 21Nom larapentu sixim diga lok ti ne Iesu, “Leeme loklox ase, maklen i do levelinga axap taram ik mokso. Maklen i do uxo doxoma solo i do tara i ruuna laasen silok kopla xopmen, ketla u lox ase luruturun mumu lavavara at ne Moroa ri limixin. 22Tong i rinama, kereva i epovo xusu mana kepe levempilas ti ne Kaisar, kopla xopmen?”

23Ketla ne Iesu ga ven kibis pam laxaxarang atdi la ga lok tidi, 24“Mina lox ase ia mi tuxuven denarias. Lemeren mi laasen atnege mo i nemen teren?”

25Diga lok, “At ne Kaisar.”

La ne Iesu ga lok, “I lox avukat mun, mina raba ne Kaisar mi lempanga i epovo at ne Kaisar, la mina raba ne Moroa mi lempanga i epovo at ne Moroa.”

26La di goxo epovo xusu nedi gita ranga alis i ro melamgo at limixin; kuren la digak lok pilo mun, mila diga sangu at lovoporang teren.

Lususue Mumu Laxakatu Kaxat Amlong

(Mt 22:23-33; Mk 12:18-27)

27Lentaba at lubung Sadiusi diga vot pasa ne Iesu. (Nedi na luvuttadi diga lok do limixin di met pam, di noxo rooro xat amlong.) Diga sue ne Iesu, 28“Laradi loklox ase, Moses ga malagan na lenavolo rinama; mo do taradi na met la latkin teren mo i rooro, ketla kopmen taxamdak atdu, neton nom laradi naba epot ap mo lanaa rixin, kusu diba visik tamdak ti ruuna ka lempanga ap mo laradi ga met. 29Ga lavanuti loxoeton; lara gomgo ga epot, la ga met gamasa, kopmen ni goxo visik taxamdak. 30Lara sepsev agepura ga epot manga at nom latkin. Neni ga met bok la goxo visik taxamdak. 31La melemu lara sepsev avantun ga epot ka mo latkin la neni ga met bok la goxo visik taxamdak. Nedi axap loxoeton diga epot ap mo latkin la nedi axap diga met la di goxo visik taxamdak. 32Melemu mo latkin ga met.” 33La diga sue ne Iesu xeretna, “At laaleng dola limixin diga met, dina xatu kaxat amlong, ti nege rinotno nom latkin? Nedi axap nom lavanuti loxoeton diga epot teren.”

34Iesu ga vorang i ridi xeretna, “Lavatlok mi lavakin at na levenmaares di epot. 35Ketla lavatlok mi lavakin mo di epovo xusu dina rooro xat amlong at lanmet la dina nemen at lorooro melemu, kopmen di noxo epot. 36Nedi diba lok ngan lubung angelo la kopmen di noxo met. Nedi laxamdak at ne Moroa, mila ne Moroa gara lox arooro amlong pam di basinge lanmet. 37La ne Moses ga vaase axasep tuturun i do luvuttadi met diba rooro xat amlong. Ni ga lox asuusu i at levelinga mumu luuna laxao gak lok teren. Ni ga paase mumu ne Moroa do,

‘Lomoroa at ne Abaram, la lomoroa at ne Aisak, la lomoroa at ne Jakop.’ ^b

38Lavasuun at na i do neni Lamgomgo at luvuttadi di rooro, la kopmen at lanmet, mila neni lavasuun at lorooro.”

39La lentaba luvuttadi loklox ase at Lenavolo diga lok, “Laradi loklox ase, lagale lovoporang taram!” 40La di goxopara bok ba xusu dina sue i mi tevesusue.

Lususue Mumu Lanarong

(Mt 22:41-46; Mk 12:35-37)

41La ne Iesu ga lok tidi, “Nemi mi tong i do Lanarong neni lurubuno avolo at ne Devit. Kereva? Na ik mokso kopla kopmen, 42mila ne Devit axa ga tong i ro at lempikpixan teren do,

‘Moroa ga lok ti Leeme Silok tarak. Kis de saparap lakngak tino, 43se nenia aba lok li nedi di munepen minu i ngan loxot burubut maxopok at luxangkedek taram.’ ^c

44Devit axa ga so asen i do Leeme Silok. Ga lok kereva la Lanarong neni manga lurubuno avolo ren?”

Iesu Ga Vaase Aronga Luvuttadi Loklok Ka Anasa Ren

(Mt 23:1-36; Mk 12:38-40)

45Nom limixin axap digang tonga i, la ne Iesu ga lok ti luvuttadi loklok ka anasa ren keretna, 46“Minak lok tatao avukat nimi basinge loklok at luvuttadi loklox ase at Lenavolo, mo di vavara i xusu dinat pas tangtagap mi laxasingsigaara babaalom atdi la di vavara i xusu limixin diba seega rangarang di mi loklok ngangao ro at loxot etang; la di vavara aleng i do dinat kis at lengkot kitkis avukat to at laraugu singising la lengkot avukat to at lara peluxa; 47la di lok kaka gamasa lempanga at lubungnaa rixin, la di ngising babaalom kusu limixin diba lok ngangao atdi. Losongsongot tidi naba lok kapmek aleng tinotno!”